«Ерлік – елге мұра»

25 сәуір 2018 жылы Қорқыт Ата атындағы Қызылорда мемлекеттік университетінде Ұлы Жеңістің 73 жылдығына орай, елбасымыз Н.Ә. Назарбаевтың «Рухани жаңғыру, болашаққа бағдар» атты мақаласының «Туған жер» бағдарламасы аясында, Қазақстан тарихы кафедрасы және Қызылорда облысының қоғамдық-саяси тарихының мемлекеттік архивінің ұйымдастыруымен «Ерлік – елге мұра» атты іс-шара болып өтті.

Елбасы өзінің мақаласында: «Мен бүгінгі замандастарымыздың жетіс¬тік¬терінің тарихына да назар аударуды ұсынамын. Бұл идеяны «Қазақстандағы 100 жаңа есім» жобасы арқылы іске асырған жөн. Жобада нақты адамдардың нақты тағдырлары мен өмірбаяндары арқылы бүгінгі, заманауи Қазақстанның келбеті көрініс табады. Біз «Жаныңда жүр жақсы адам» деген сөз¬дің байыбына бара бермейміз. Шын мәнінде, Тәуел-сіздік дәуірінде өзінің еңбегімен, білімімен, өнері¬мен озып шыққан қаншама замандастарымыз бар. Олардың жүріп өткен жолдары – кез келген статистикадан артық көрсеткіш. Сондықтан, оларды телевизиялық деректі туындылардың кейіпкеріне айналдыруымыз керек. Жастар өмірге шынайы көзбен қарап, өз тағдырларына өздері иелік ете алатын азаматтар болуы үшін оларға үлгі ұсынуымыз керек.» - дейді.
Осындай үлгі тұтар тұлғаларымыздың бірі, өз Отанына шексіз берілген, патриоттық рухы жоғары, қайсар жауынгер, Сыр өңірінің белгілі азаматы, Ұлы Отан соғысы және еңбек ардагері Бөрібай Құлманұлымен кездесу ұйымдастырылды. Кездесуді Қазақстан тарихы кафедрасының меңгерушісі М.С. Қараманова ашып, Ұлы Отан соғысының тарихи маңызына тоқталып, соғыс ардагерлерінің ерліктерін атап, Бөрібай атамызға шексіз алғысын жеткізді. Кездесуде Бөрібай атамыз соғыс кезеңіндегі естеліктерін айтып, студент жастарды Отанын сүюге, Отанының патриоты болуға шақырып, батасын берді. Кездесуде кафедраның профессоры М.Н Аңсатова Бөрібай Құлманұлының өмірбаяны, қызметі туралы баяндама жасады және Қызылорда облысының қоғамдық-саяси тарихының мемлекеттік архивінің директоры Г.Т. Ахметова Бөрібай атамызға алғысын білдірді.
Сонымен қатар қызметтес болған, Жаңақорған, Жалағаш аудандарының құрметті азаматы Далдабаев Сәмит ағамыз Бөрібай атамызға қатысты естеліктер айтты және Музыкалық білім және дәстүрлі музыка өнері кафедрасының оқытушысы Искакова Гүлнар апайымыз бірнеше күйлер орындап ыстық лебіздерін жеркізді.
Іс-шарада АЭ-16-1, Ист-16-1, АЭ-17-1, АЭ-16-1 оқу тобының студенттері атамызға сұрақтарын қойып, өз өнерлерін көрсетті. Кездесуде Қызылорда облысының қоғамдық-саяси тарихының мемлекеттік архивінен алынған тың материалдардан фото- және видео- фильм көрсетілді, көме ұйымдастырылды.
Кездесу соңында Бөрібай Құлманұлына Қазақстан тарихы кафедрасы және Қызылорда облысының қоғамдық-саяси тарихының мемлекеттік архиві мамандарының атынан сыйлықтар табысталды. Атамыз білім алушыларға алғысын білдіріп, жас ұрпаққа өз бата-тілектерін жеткізді.

JoomShaper